Кондак 1
Избра́ннии от всех племе́н и наро́дов в язы́к свят, ца́рское свяще́ние, сы́ны Све́та и насле́дницы Ца́рствия, прииди́те возра́дуемся Го́сподеви и Спаси́телю Бо́гу, в Вифлее́ме Ро́ждшемуся и нас ра́ди пелена́ми повива́емому, с волхвы́ и па́стыри поклони́мся, а́нгельскую вси в весе́лии пою́ще песнь: Сла́ва в вы́шних Бо́гу и на земли́ мир, в челове́цех благоволе́ние!
Икос 1
А́нгелом недове́домую, пресла́вную та́йну Твоего́ смотре́ния на коне́ц веко́в открыва́я, Христе́, я́ко Младе́нец в я́слех безслове́сных возлежи́ши и во убо́зем верте́пе ми́ру явля́ешися, Сло́ве Бо́жий, безна́чальне. Тем у́бо со стра́хом и ра́достию взира́юще на неисповеди́мое истоща́ние Твое́, си́це Тебе́ зове́м:
Сла́ва Тебе́, Све́те Ти́хий, от Де́вы ми́ру возсия́вый; сла́ва Тебе́, А́нгелов Ра́досте, во страну́ пла́ча прише́дый.
Сла́ва Тебе́, Нача́льниче ми́ра, спасе́ние благовести́вый; сла́ва Тебе́, Сы́не Бо́жий, Собо́ю то́е устро́ивый.
Сла́ва в вы́шних Бо́гу и на земли́ мир, в челове́цех благоволе́ние!
Кондак 2
Ви́дев нищету́ и поги́бель ро́да челове́ческаго, всемогу́щее светоза́рное Сло́во Бо́жие, с Небесе́, от Престо́ла Ца́рскаго, во юдо́ль земну́ю поги́бельную сни́де, во спасе́ние пою́щих Ему́: Аллилу́иа.
Икос 2
Разуме́в ду́хом проро́к Авваку́м прише́ствие Твое́, ужа́сся вопия́ше. Мы же сбытие́ та́йны сея́ зря́ще, Вифлее́м че́ствуем и я́слем Твоим покланя́емся, зову́ще:
Сла́ва Тебе́, Бо́жия Прему́дросте и Си́ло; сла́ва Тебе́, омраче́нную не́мощь на́шу посети́вый.
Сла́ва в вы́шних Бо́гу и на земли́ мир, в челове́цех благоволе́ние!
Кондак 3
Си́лы Небе́сныя ве́лиим гла́сом восхвали́ша Тя, све́тлое Со́лнце Сла́вы, восходя́щее от де́вственнаго О́блака и просвеща́ющее мир за милосе́рдие безме́рное, и в весе́лии воспе́ша: Аллилу́иа.
Икос 3
Име́яй престо́л не́бо и подно́жие зе́млю ме́ста ни еди́на обре́те во оби́тели, те́мже Чи́стая Де́ва, Ма́ти Твоя́, сокрыва́ет Тя от хла́да нощна́го в худе́м верте́пе. Дивя́щеся милосе́рдию Твоему́, си́це Тебе́ зове́м:
Сла́ва Тебе́, по нам неизрече́нно обнища́вый; сла́ва Тебе́, неизче́тно нас обогати́вый.
Сла́ва в вы́шних Бо́гу и на земли́ мир, в челове́цех благоволе́ние!
Кондак 4
Бу́рею сумни́тельных помышле́ний мяте́тся И́род и весь Иерусали́м с ним; ца́рие же восто́чнии Тебе́, Царю́ царе́й, да́ры избра́нныя прино́сят, зову́ще: Аллилу́иа.
Икос 4
Слы́шав Ада́м первозда́нный глас Го́спода сла́вы, стра́хом скры́ся. Ны́не же Ты, Спа́се, низхо́диши на зе́млю, зрак Ада́мов нося́, взыска́ти поги́бшаго, вопию́ща Тебе́:
Сла́ва Тебе́, с Небесе́ до́лу низше́дый; сла́ва Тебе́, челове́ка горе́ вознесы́й.
Сла́ва в вы́шних Бо́гу и на земли́ мир, в челове́цех благоволе́ние!
Кондак 5
Боготе́чная звезда́ с высоты́ показу́ет Тя, изда́вна предвозвеще́нную мы́сленную Звезду́, от Иа́кова возси́явшую, и воспе́ти Тебе́: Аллилу́иа.
Икос 5
Прови́дев издале́ча день Твой, Христе́, пра́отец Твой Авраа́м возра́довася ду́хом; мы же ви́дяще Тя на рука́х Де́вы, ра́достно срета́ем Тя пе́нии си́ми:
Сла́ва Тебе́, млеко́м Неискусому́жныя пита́емый; сла́ва Тебе́, пита́яй вся́ческую тварь.
Сла́ва в вы́шних Бо́гу и на земли́ мир, в челове́цех благоволе́ние!
Кондак 6
Пропове́дует ми́ру ми́лостивое Твое́ прише́ствие проро́к Илия́ Фесви́тянин: не в бу́ри, ни во огни́, но во гла́се хла́да то́нка соше́л еси́ на зе́млю, Го́споди, спаса́я вся зову́щия: Аллилу́иа.
Икос 6
Возсия́ иногда́ свет Небе́сный па́стырем вифлее́мским; те́мже и мы в нощи́ жития́ сего́ ле́ности сон отрясе́м, да Ему́ воззове́м:
Сла́ва Тебе́, Хле́бе живо́тный, всех ду́ши пита́яй; сла́ва Тебе́, от гла́да сме́ртнаго мир избавля́яй.
Сла́ва в вы́шних Бо́гу и на земли́ мир, в челове́цех благоволе́ние!
Кондак 7
Хотя́ испра́вити горды́ню первозда́ннаго челове́ка, смири́л еси́ Себе́ Сама́го, Сло́ве Бо́жий, до я́слей, о́браз нам дая́, Тебе́, Царю́ вся́ческих, зову́ще: Аллилу́иа.
Икос 7
Ди́вную та́йну воплоще́ния смири́вшагося Бо́га воспева́юще днесь, припаде́м Богомладе́нцу, в я́слех лежа́щему, во умиле́нии зову́ще:
Сла́ва Тебе́, на земли́ рожде́йся; сла́ва Тебе́, ми́ру дарова́вый возрожде́ние.
Сла́ва в вы́шних Бо́гу и на земли́ мир, в челове́цех благоволе́ние!
Кондак 8
Стра́нна и прише́льца Бо́га ви́дящи на земли́, устрани́мся су́етнаго ми́ра и взы́щем всеме́рно Небе́снаго на́шего Оте́чества, воспева́юще Ему́: Аллилу́иа.
Икос 8
Весь был еси́ до́лу в я́слех, непостижи́ме Го́споди, горе́ на Престо́ле со Отце́м седя́й. Мы же прино́сим Ти сле́зы умиле́ния, си́це глаго́люще:
Сла́ва Тебе́, недр Оте́ческих не отступи́вый; сла́ва Тебе́, с до́льними челове́ки неизре́ченно пожи́вый.
Сла́ва в вы́шних Бо́гу и на земли́ мир, в челове́цех благоволе́ние!
Кондак 9
Вся земля́ бога́тство любве́ Твоея́ позна́, Иису́се Всецарю́, егда́ Себе́ Сама́го я́ко Младе́нца гре́шному ми́ру во очище́ние дарова́л еси́. Сего́ ра́ди во ве́ки благода́рственне зову́т Ти: Аллилу́иа.
Икос 9
Вети́я многовеща́нныя недоуме́ют воспе́ти неизрече́нное Рождество́ Твое́. Приими́ у́бо благода́рныя сле́зы земноро́дных, Тебе́ припа́дающих и вопию́щих:
Сла́ва Тебе́, изобреты́й всяк путь худо́жества; сла́ва Тебе́, соедини́вый с челове́ки Божество́.
Сла́ва в вы́шних Бо́гу и на земли́ мир, в челове́цех благоволе́ние!
Кондак 10
Спасе́ние соде́лал еси́ ми́ру стра́нным истоща́нием Твои́м и вы́шнее Ца́рствие отве́рзл еси́ соше́ствием Твои́м, немо́лчно зову́ще: Аллилу́иа.
Икос 10
Царю́ Преве́чный, рожде́йся на земли́ челове́ка ра́ди, Христе́ Бо́же! Даждь нам помина́ти Твоя́ благодея́ния и чи́стым се́рдцем воспева́ти Тебе́ сицева́я:
Сла́ва Тебе́, Царю́ веко́в, вы́шнее Ца́рство ве́рным отверза́яй; сла́ва Тебе́, Па́стырю до́брый, заблу́дших ове́ц призыва́яй.
Сла́ва в вы́шних Бо́гу и на земли́ мир, в челове́цех благоволе́ние!
Кондак 11
Песнь благодаре́ния приими́ от нас, Сло́ве Бо́жий, и сподо́би нас подъя́ти Тя, Христа́, пло́тию младе́нствующа, Его́же горе́ пою́т непреста́нно А́нгели Бо́жии, зову́ще: Аллилу́иа.
Икос 11
Све́том оде́яйся, я́ко ри́зою, безсла́вен и наг в мир сей вхо́дит Бо́жие Сло́во, Ему́же покланя́ющеся вси глаго́лем:
Сла́ва Тебе́, Сло́ве, во я́слех немотству́яй; сла́ва Тебе́, доброте́ молча́ния науча́яй.
Сла́ва в вы́шних Бо́гу и на земли́ мир, в челове́цех благоволе́ние!
Кондак 12
Благода́ть спаси́тельная всем челове́ком яви́ся и всех избавле́ние приспе́. Го́ры и хо́лми, челове́цы и А́нгели, вся́кое ды́хание и тварь, воскли́кните срета́юще Того́: Аллилу́иа.
Икос 12
Пою́ще ве́лие та́инство Твоего́ вочелове́чения, Го́споди, мо́лим Тя, раби́ Твои́: поми́луй и спаси́ всех, чту́щих Твое́ е́же от Де́вы неизрече́нное Рождество́ и любо́вию зову́щих Ти:
Сла́ва Тебе́, на земли́ воплоти́выйся благовести́ти заблу́ждшим; сла́ва Тебе́, до а́да снизше́дый взыска́ти па́дших.
Сла́ва в вы́шних Бо́гу и на земли́ мир, в челове́цех благоволе́ние!
Кондак 13
О, неизсле́димая и неизглаго́ланная Бе́здно Любве́ и Щедро́т, младе́нствуяй пло́тию Иису́се! Приими́ приноси́мое Тебе́ убо́гое сие́ моле́ние и не возгнуша́йся возлещи́ в я́слех безслове́сныя души́ моея́, да во ве́ки пою́ Ти: Аллилу́иа.
(Сей кондак читается трижды, затем икос 1 и кондак 1.)
Икос 1
А́нгелом недове́домую, пресла́вную та́йну Твоего́ смотре́ния на коне́ц веко́в открыва́я, Христе́, я́ко Младе́нец в я́слех безслове́сных возлежи́ши и во убо́зем верте́пе ми́ру явля́ешися, Сло́ве Бо́жий, безна́чальне. Тем у́бо со стра́хом и ра́достию взира́юще на неисповеди́мое истоща́ние Твое́, си́це Тебе́ зове́м:
Сла́ва Тебе́, Све́те Ти́хий, от Де́вы ми́ру возсия́вый; сла́ва Тебе́, А́нгелов Ра́досте, во страну́ пла́ча прише́дый.
Сла́ва в вы́шних Бо́гу и на земли́ мир, в челове́цех благоволе́ние!
Кондак 1
Избра́ннии от всех племе́н и наро́дов в язы́к свят, ца́рское свяще́ние, прииди́те возра́дуемся Го́сподеви и Спаси́телю Бо́гу, в Вифлее́ме Ро́ждшемуся, а́нгельскую вси в весе́лии пою́ще песнь: Сла́ва в вы́шних Бо́гу и на земли́ мир, в челове́цех благоволе́ние!
Тропарь, глас 4
Рождество́ Твое́, Христе́ Бо́же наш, возсия́ ми́рови свет ра́зума: в нем бо звезда́м служа́щии звездо́ю уча́хуся Тебе́ кла́нятися, Со́лнцу Пра́вды, и Тебе́ ве́дети с высоты́ Восто́ка. Го́споди, сла́ва Тебе́.
Кондак, глас 3
Де́ва днесь Пресу́щественнаго ражда́ет, и земля́ верте́п Непристу́пному прино́сит; А́нгели с па́стырьми славосло́вят, волсви́ же со звездо́ю путеше́ствуют: нас бо ра́ди роди́ся Отроча́ Мла́до, Преве́чный Бог.
Молитва
О, Сладча́йший Иису́се, Сло́ве Бо́жий, Сы́не Де́вы! Сподо́би ны́не изы́ти любо́вию в сре́тение Тебе́, низходя́щему на зе́млю нас ра́ди, и в день исхо́да на́шего от вре́меннаго жития́ сего́ приими́ нас в Небе́сныя Твоя́ селе́ния, да со А́нгелы святы́ми пое́м и сла́вим Тя, Спа́са душ на́ших, во ве́ки веко́в. Ами́нь.